Posts

Showing posts from May 19, 2011

GHAZAL-9DHADKANEN CHUBHNE LAGI HAIN DIL MEN ITNA DARD HAI

DHADKANEN CHUBHNE LAGI HAIN DIL MEN ITNA DARD HAI TOOT'TE DIL KI SADAA BHI AAJ KITNI SARD HAI IS TAMAAZAT SE ZAMEEN KI HASRATEN KUMHLA GAIN DHOOP KI SHIDDAT SE CHEHRA HAR SHAJAR KA ZARD HAI AB KAHAN JAAEN TAMANNAON KI GATHRI LE KE HAM SHEHR HI DUSHMAN HUA HAI MUNHARIF HAR FARD HAI IS TARAH AB KE NICHODA HAI MUJHE TAQDEER NE HASRATEN KHAAMOSH HAIN AB TO LAHOO BHI SARD HAI BAARAHAA TOOTA HAI MERA YE WAJOOD E SAKHT JAA.N KYA BATAAEN ZEHN BHI KAISA ANAA PARWARD HAI JAB BHI DIL ANGDAAI LETA HAI DAHEL JAATI HOON MAIN KHAUF AATA HAI, KHUSHI BHI KITNI GHAM AAWARD HAI JUSTJOO KAISI HAI KIS SHAY KI HAI MUJH KO AARZOO MUSTAQIL BECHAIN RAKHTA HAI, JUNOO.N BEDARD HAI AISA LAGTA HAI KE SADIYON SE YE DIL VEERAAN HAI AARZOO'ON PAR JAMI 'MUMTAZ' KAISI GARD HAI